โย จ พุทฺธญฺจ ธมฺมญฺจ, สงฺฆญฺจ สรณํ คโต;
จตฺตาริ อริยสจฺจานิ, สมฺมปฺปญฺญาย ปสฺสติฯ
[191]
ทุกฺขํ ทุกฺขสมุปฺปาทํ, ทุกฺขสฺส จ อติกฺกมํ;
อริยํ จฏฺฐงฺคิกํ มคฺคํ, ทุกฺขูปสมคามินํฯ
[192]
เอตํ โข สรณํ เขมํ, เอตํ สรณมุตฺตมํ;
เอตํ สรณมาคมฺม, สพฺพทุกฺขา ปมุจฺจติฯ
[193]
ทุลฺลโภ ปุริสาชญฺโญ, น โส สพฺพตฺถ ชายติ;
ยตฺถ โส ชายติ ธีโร, ตํ กุลํ สุขเมธติฯ
[194]
สุโข พุทฺธานมุปฺปาโท, สุขา สทฺธมฺมเทสนา;
สุขา สงฺฆสฺส สามคฺคี, สมคฺคานํ ตโป สุโขฯ
[195]
ปูชารเห ปูชยโต, พุทฺเธ ยทิ ว สาวเก;
ปปญฺจสมติกฺกนฺเต, ติณฺณโสกปริทฺทเวฯ
[196]
เต ตาทิเส ปูชยโต, นิพฺพุเต อกุโตภเย;
น สกฺกา ปุญฺญํ สงฺขาตุํ, อิเมตฺตมปิ เกนจิฯ
พุทฺธวคฺโค จุทฺทสโม นิฏฺฐิโตฯ
15. สุขวคฺโค
[197]
สุสุขํ วต ชีวาม, เวริเนสุ อเวริโน;
เวริเนสุ มนุสฺเสสุ, วิหราม อเวริโนฯ
[198]
สุสุขํ วต ชีวาม, อาตุเรสุ อนาตุรา;
อาตุเรสุ มนุสฺเสสุ, วิหราม อนาตุราฯ
[199]
สุสุขํ วต ชีวาม, อุสฺสุเกสุ อนุสฺสุกา;
อุสฺสุเกสุ มนสฺเสสุ, วิหราม อนุสฺสุกาฯ
[200]
สุสุขํ วต ชีวาม, เยสํ โน นตฺถิ กิญฺจนํ;
ปีติภกฺขา ภวิสฺสาม, เทวา อาภสฺสรา ยถาฯ
[201]
ชยํ เวรํ ปสวติ, ทุกฺขํ เสติ ปราชิโต;
อุปสนฺโต สุขํ เสติ, หิตฺวา ชยปราชยํฯ
[202]
นตฺถิ ราคสโม อคฺคิ, นตฺถิ โทสสโม กลิ;
นตฺถิ ขนฺธสมา [ขนฺธาทิสา (สี. สฺยา. ปี. รูปสิทฺธิยา สเมติ)] ทุกฺขา, นตฺถิ สนฺติปรํ สุขํฯ
[203]
ชิฆจฺฉาปรมา โรคา, สงฺขารปรมา [สงฺการา ปรมา (พหูสุ)] ทุขา;
เอตํ ญตฺวา ยถาภูตํ, นิพฺพานํ ปรมํ สุขํฯ
[204]
อาโรคฺยปรมา ลาภา, สนฺตุฏฺฐิปรมํ ธนํ;
วิสฺสาสปรมา ญาติ [วิสฺสาสปรโม ญาติ (ก. สี.), วิสฺสาสปรมา ญาตี (สี. อฏฺฐ.), วิสฺสาสา ปรมา ญาติ (ก.)], นิพฺพานํ ปรมํ [นิพฺพาณปรมํ (ก. สี.)] สุขํฯ
[205]
ปวิเวกรสํ ปิตฺวา [ปีตฺวา (สี. สฺยา. กํ. ปี.)], รสํ อุปสมสฺส จ;
นิทฺทโร โหติ นิปฺปาโป, ธมฺมปีติรสํ ปิวํฯ
[206]
สาหุ ทสฺสนมริยานํ, สนฺนิวาโส สทา สุโข;
อทสฺสเนน พาลานํ, นิจฺจเมว สุขี สิยาฯ
[207]
พาลสงฺคตจารี [พาลสงฺคติจารี (ก.)] หิ, ทีฆมทฺธาน โสจติ;
ทุกฺโข พาเลหิ สํวาโส, อมิตฺเตเนว สพฺพทา;
ธีโร จ สุขสํวาโส, ญาตีนํว สมาคโมฯ
[208]
ตสฺมา หิ –
ธีรญฺจ ปญฺญญฺจ พหุสฺสุตญฺจ, โธรยฺหสีลํ วตวนฺตมริยํ;
ตํ ตาทิสํ สปฺปุริสํ สุเมธํ, ภเชถ นกฺขตฺตปถํว จนฺทิมา [ตสฺมา หิ ธีรํ ปญฺญญฺจ, พหุสฺสุตญฺจ โธรยฺหํ; สีลํ ธุตวตมริยํ, ตํ ตาทิสํ สปฺปุริสํ; สุเมธํ ภเชถ นกฺขตฺตปถํว จนฺทิมา; (ก.)]ฯ
สุขวคฺโค ปนฺนรสโม นิฏฺฐิโตฯ
16. ปิยวคฺโค
[209]
อโยเค ยุญฺชมตฺตานํ, โยคสฺมิญฺจ อโยชยํ;
อตฺถํ หิตฺวา ปิยคฺคาหี, ปิเหตตฺตานุโยคินํฯ
[210]
มา ปิเยหิ สมาคญฺฉิ, อปฺปิเยหิ กุทาจนํ;
ปิยานํ อทสฺสนํ ทุกฺขํ, อปฺปิยานญฺจ ทสฺสนํฯ
[211]
ตสฺมา ปิยํ น กยิราถ, ปิยาปาโย หิ ปาปโก;
คนฺถา เตสํ น วิชฺชนฺติ, เยสํ นตฺถิ ปิยาปฺปิยํฯ
[212]
ปิยโต ชายตี โสโก, ปิยโต ชายตี [ชายเต (ก.)] ภยํ;
ปิยโต วิปฺปมุตฺตสฺส, นตฺถิ โสโก กุโต ภยํฯ
[213]